آرمی چیف کی مدت ملازمت میں توسیع قومی مفاد کا تقاضا ہے: اداکارہ وینا ملک

شہرہ آفاق اداکارہ وینا ملک نے کہا ہے کہ پاکستان کی موجودہ صورت حال کے تناظر میں آرمی چیف جنرل قمرجاوید باجوہ کی مدت ملازمت میں توسیع کی اشد ضرورت ہے ۔ تفصیلات کے مطابق سماجی رابطے کی ویب سائٹ ٹوئٹر پر کئے گئے ٹوئٹس میں وینا ملک نے کہا کہ پاکستان کی موجودہ صورتحال میں آرمی چیف جنرل باجوہ مسلہ کشمیر کے حل، انڈیا کے ساتھ کشیدہ حالات، افغان امن معاملات اور پاکستان کی اندرونی سازشوں کا بھرپور طریقے سے مقابلہ کر رہے ہیں اور موجودہ حالات میں آرمی چیف کی مدت ملازمت میں توسیع وقت کی ضرورت ہے۔
ادا کارہ نے کہا کہ چیف آف آرمی جنرل قمر جاوید باجوہ نے پاکستان اندرونی و بیرونی دشمنوں کی سازشوں کو ناکام بنایا ہے۔ پاکستان کے دفاع کو مضبوط کرنے کے ساتھ ساتھ عالمی سطح پر پاکستان کی ساکھ کو بہتر کرنے میں بھی ان کا اہم کردار ہے وینا ملک کا کہناتھا کہ جنرل قمر جاوید باجوہ کے نام پر تنقید کرنے والے اور اب ان کی توسیع کے معاملے پر عوام کو گمراہ کرنے والے افراد کا مفاد ہرگز پاکستان کے اندرونی حالات کی بہتری میں نہیں ہے ۔انہوں نے کہا کہ اداروں کا ایک دوسرے کے ساتھ تعاون وقت کی اہم ضرورت ہے۔ پاکستان کے موجودہ حالات میں سپاہ سالار کے انتخاب کو تنقید کا نشانہ بنانے والے افراد ملک دشمنی کا ارتکاب کر رہے ہیں۔

اپنا تبصرہ بھیجیں